زيارة لأطفال مركز أورام طنطا

محدش نفسه يقضى يوم مع أطفال جمال
ويلعب ويهزر ويتكلم معاهم
ويجبلهم هديه جميله معاه

أكيد كتيييييييييير مننا نفسهم فى يوم زى ده

طب تعملوا ايه لو عرفتم أن الأطفال دول مرضى
و أن حضورك ليهم ده حاجه هما بيتمنوها و بيفرحوا جدا بيها

هتعمل ايه لو عرفت ان مش كتير حد بيجيلهم
وأنهم عندهم احباط من كتر ما شافوا اصحابهم اللى معاهم كل يوم بيموت منهم حد .

كلنا هنروح -- هنروح علشان نفرحهم وعلشان ميحسوش انهم لوحدهم
هنروح علشان نصبر امهاتهم ونقولهم أحنا جمبكم .

هنجيب معانا دوا وعسل علشان نساعدهم بخطوه فى مشوار العلاج .

علشان كده هنحتاج لحاجات كتير اوى

اول واهم حاجه
محتاجنكم انتم معانا علشان ترسموا بسمه جميله على وشوش الاطفال دول .
ومحتاجين ادويه - عسل نحل - وعصاير - والعاب للأطفال - وزينه وبلونات - وكراسات تلوين والوان .

كــــــــــــــل ده امتى بقى ؟؟

هيبقى ان شاء الله يوم الجمعه 20/11/2009
الساعه 2 الظهر بالظبط
هنتجمع ان شاء الله قدام المركز

ولأى أستفسار برجاء الاتصال على

أ/ محمود نشـأت 0187820257

أو عن طريق الجروب

زيارة دار المكفوفين في مدينة رام الله / فلسطين

بقالي مدة طويلة متابعتش المدونة مع الفريق علشان كده حبيت اليوم اجيب خبر صغير او مهمة صغيرة عملناها امبارح يعني بتاريخ 1/11/2009 , وكانت الاحداث كالتالي
نحنا طلاب جامعة بيرزيت انطلقنا من الجامعة لمركز الأكفاء في مدينة البريرة / رام الله بجروب عمل تطوعي , هي مدرسة كبيرة اوي فيها طلاب من الصف الاول للصف التاسع وكلهم كفيفين يعني مبيشفوش , عملنالهم حفلة صغيرة شاركانهم همومهم واحزانهم , وشفنا ابداعاتهم ومواهبهم الرائعة , وكان من اسعد الايام اللي قضيتها بجد ,لاني حسيت بيهم اكتر , وقررنا باذن الله نزورهم كل اسبوع .
التجربة دي علمتني احاسيس جميلة اوي ... ولو جربتوا حتحسوا بالكلام اللي بقوله أكتر .
انا ححط الصورعن الموضوع ان شاء الله بوقت قريب
وتحيتي ليكم كلكم

أمسيه ابني حلمك بايجابيتك

يتشرف فريق شباب صح ,,واعضاء جروب ابني حلمك بايجابيتك بدعوتكم لحضور اولى امسيات الحمله

تحت عنوان ,,,
*تحديد الاهداف والتخطيط للمستقبل
*تنطيم الوقت


يحاضر في الامسيه كل من
* مدرب /محمود راغب
مدرب بالمعهد الامريكي

*مدربه /ساره السعيد
مسؤول تنميه بشريه فريق شباب صح



ان شاء الله يوم الثلاثاء الموافق 20/10 ,, في قصر ثقافه المحله الكبرى ,, في تمام الساعه 5مساء

وطبعا الامسيه دي علشان خاطر
كل واحد يهمه انو يحدد مستقبله علشان يبقى عارف هوا رايح فين ,, وازاي يوصل للمكان الي هوا رايح ليه .......... علشان كل واحد فينا اكيد يستاهل الاحسن ليه ولمستقبله


متنسوش يا جماعه الميعاد ,,,

منتظرين ردودكم ,, او اي استفسارات ليكم تخص الحمله
او الامسيه

--------------------------------------
للاستعلام

Phone:	0187820257
Email:	shbabsa7@gmail.com

حفل وافطار جماعى مع الايتام

السلام عليكم ورحمه الله و بركاته

ان شاء الله يا شباب هنعمل حفله وافطار جماعى مع الاطفال الايتام

هنلعب مع الاطفال
ونعمل مسابقات
ونرسم و نلون
وهنوزع العاب عليهم
وهنفطر كلنا سوا فى الاخر

شاركوا معانا

------------------------------------------------------------------

المكان : نادى الصيد فى المحله
اليوم 17/9/2009 الخميس
الوقت : الساعه 2 ظهرا

--------------------------------------------------------------------
المطلوب :

كل واحد يا جماعه يحب يحضر معانا يقول فى رساله للاكونت بتاع الجروب علشان نعمل حسابنا فى الوجبات

http://www.facebook.com/profile.php?id=100000012834892

واللى هيجى يجيب معاها 10 جنيه بقى علشان الوجبه بتاعه :D

والناس اللى مش بتاكل من بره تبقى تجيب اكلها معاها بقى لان الكل هياكل ان شاء الله
------------------------------------------------------------------------

للاستعلام

Phone:	0187820257
Email:	shbabsa7@gmail.com

:
:

شنطة المدرسة

بسم الله الرحمن الرحيم
الوقت اللي احنا فيه دلوقتي بيسمي موسم مش بس عشان رمضان موسم الخيرات والحسنات لكن لأنه وقت زحمه جدا وفيه مصاريف كتير جدا علي الاب او عائل الاسرة ، الاب متوسط الحال دايما بيشتكي من الفترة دي ، ليه ؟
لأنها رمضان _ عيد _ مدارس _ وكمان شتاء
يعني الاب ما بيصدق يخلص مصاريف رمضان الياميش والاكل وبلح الشام ، يدخل علي العيد ومصاريف الكحك والعيدة ولبس العيد اللي بيبقي صيفي ، وبعدها تيجي المدارس مصاريف المدرسة واحتياجات المدرسة لبس المدرسة الدروس والكتب الخارجيه
كل دي مصاريف علي الاب اللي دخله متوسط طيب ما بالك بقي بالاب الفقير او المريض او الام اللي بتصرف علي اولادها الايتام وغيرهم وغيرهم
احنا حاولنا نخفف عنهم في رمضان و عملنا وناس كتير عملت شنطة رمضان الغذائية والحمد لله قدرنا نوصلها للناس
لكن احنا دلوقتي فكرنا ف فكرة تانية نقدر نساعدهم بيها ونشيل عنهم الحمل ونحلو ان احنا نفرحهم ونبسطهم علي قد ما نقدر ، فكرنا في شـنـطـة الـمـدرسـة
شنطة المدرسة هي عبارة عن احتياجات الطالب في مدرسته من كشاكيل و اقلام واستايك والحاجات البسيطة دي
الحاجات دي رغم بساطتها إلا انها هتفرح الطفل وهتشيل حمل من علي اهله
وان شاء الله نقدر نعمل حاجة تفرحهم وتبسطهم

الشنطة دي هتتكون ان شاء الله من
2 قلم جاف
2قلم رصاص
استيكة
مبراه
مسطره
مقلمه صغنونة
علبه هندسية لطلبة اعدادي
وكشاكيل وكراسات هتختلف عددها حسب المرحله التعليمية
وان شاء الله هنحط كمان استيكر صغنون كده عشان الاطفال يفرحوا

---------------------------------------------

للتواصل
0187820257
او
shbabsa7@gmail.com

أفطار صائم الطريق

قال رسول الله صلى الله عليه وسلم :
" من فطر صائما كان له مثل أجره غير انه لا ينقص من اجر الصائم شئ "
رواه الترمزى وصححه الألبانى

عايز تاخد ثواب طوال شهر رمضان
وتبقى زى ما الرسول غليه الصلاه والسلام قال ليك اجر صائم كمان .

شارك معانا فى أفطار صائم الطريق

هننزل كل يوم قبل الفطار نوزع وجبات أفطار على المسافرين لحد أدان المغرب .

الموضوع مش بياخد دقايق بس ثوابه كبير جدا .

أحنا بدانا فى تنفيذه فى مدينه المحله الكبرى يا ريت ناس تانيه كتير تنفذه فى مناطق ومدن تانيه كمان .

يلا شارك معانا واتبرع بدقايق من وقتك اى يوم تحبه طوال شهر رمضان

تواصل معانا من خلال

Phone	0187820257
Email:	shbabsa7@gmail.com

كورسات " شباب صح " للبرمجه والجرافيكس

السلام عليكم ورحمه الله

جروب " شباب صح " جايب ليكم احلى مفاجأه النهارده
" كورسات فى البرمجة والجرافيكس "

لكن الجديد اللى بيقدمه جروب " شباب صح " أن الكورسات دى هتكون بربع تمنها الحقيقى.
وقارنوا اسعار الكورسات دى باسعارها فى اى مركز تانى .

كورساتنا عباره عن ايه بالظبط ؟؟!

أحنا بنقدم 4 كورسات

1- ثرى دى ماكس
3D MaX
ودى مقسمه لكورسين
- موديلنغ
- خامات و أضاءات

=== سعر الكورس 350 جنيه ===

2- ----- كورس الخدع البصرية والسنمائية -----
الشهير جدا
adob after effects

أكيد ناس كتير عارفه سعر الكورس ده الحقيقى بس معانا هتدفع أقل من ربع سعره

=== سعر الكورس 350 جنيه ===

3- كورس " أحتراف الفوتوشوب "

الكورس الرائع اللى اللى هيخليك تعرف كل حاجه فى الفوتوشوب من غير ما تاخد عبء بقيت كورسات الجرافيكس

=== سعر الكورس 250 جنيه ===

4- كورس " برمجة التطبيقات التجارية والمحاسبة "

وطبعا اكيد كتير سألوا عليه وعارفين سعر الكورس ده كام


=== سعر الكورس 350 جنيه ===


-------------------------------------------------------------

المفاجأه الكبــيره بقى
" كل الكورسات الموجوده هتاخد معاها شهاده من أكاديميه ثينك المعتمده من شركه أدوب Adob "
يعنى مش مجرد دراسه كمان شهاده عالميه .

وكمان تانى مفاجاه
ان اللى هيحاضر الكورسات هو الأستاذ / أحمد عبد الرحمن

تحت رعايه مركز ثينك Think
المحله الكبرى

للاستعلام

- مركز ثينك المحله ... أمام كميدار للسياحه

- أو الاتصال بالاستاذ / أحمد عبد الرحمن
0144133899

http://cgway.net/
http://smartsoftegy.com/

الأيفنت على الفيس بوك

http://www.facebook.com/group.php?gid=2764...id=109077958499

شنطه رمضان

بسم الله الرحمن الرحيم

شهر رمضان قرب جدا يا شباب

واحنا الشهر ده لازم نعمل حاجه أيجابيه للناس اللى حولينا

وعلشان كده قررنا نعمل شنطه رمضان السنه دى

وبدأنا بالفعل تجميع للشنطه علشان عارفين ان الأسعار بتغلى قبل رمضان واحنا عايزين نجيب اكبر كميه ممكنه

أنتوا ممكن تساعدونا وتشتركوا معانا أزاى ؟؟؟؟

1- تتبرع بالمواد الغذائيه او حتى بفلوس نقدر نشترى بيها الطعام .

2- ساعدنا فى تجميع المواد الغذائيه و شرائها ونقلها .

3- ساعدنا فى تعبئه الشنط .

4- ساعدنا فى توزيع الشنط وتوصيلها لكل مسلم محتاج .


شارك معانا حتى لو بنشر الموضوع
وأكسب ثواب أفطار مسلم صائم

Shbabsa7@gmail.com

0187820257

تقرير حفله الأيتام .... 10/4/2009

السلام عليكم ورحمه الله
===============

دى شويه صور بس ممكن تعبر عن بعض لحظات اليوم الرائع ده

الحمد لله قدرنا ننفذ كل البرنامج اللى كان محطوط لليوم ده
وقدرنا نسعد الأطفال الجمال دول
وكمان أحنا كنا فى غايه السعاده وأحنا بنلعب مع الأطفال الجمال دول .

بجد اللى مجاش اليوم ده فاته كتير

==========================================

اللى يحب يشوف اليوم كان عامل ازاى بالصور والفيديو يدخل على الجروب بتاعنا على الفيس بوك

face book

تقرير حفله أمهات المعاقين

بسم الله الرحمن الرحيم

السلام عليكم
أزيكوا يا شباب الخير

الحمد لله الحفله كانت جميله جدا جدا وانبسطنا كلنا فيها اوى اوى

أكيد عاوزين تعرفوا ايه اللى حصل فى اليوم الجميل ده ....

أتجمعنا الصبح
كنا كتير
من المحله
ومن المنصوره
ومن بشبيش

ودخلنا نادى البلديه وبدأنا فى تجهيز اليوم
وحضر معانا اكتر من 45 طفل وامهاتهم
و بدأنا اليوم

بالقرآن الكريم وقالته (فايزه ) .و
وبعد كده الحديث الشريف وقالته ( ريهام ) ودول أحد المعاقين

- وكمان كان فيه كورال للاطفال وغنوا انشوده محمد نبينا

- وبعد صلاه الظهر بدأ فتره دى جى مفتوحه للأطفال
وكان الجو وكله لعب ورقص وجرى

- وبعديها جات فقره مسرح العرايس والاطفال فرحوا اوى بيه

-وعلى طول بدانا فقره الرسم والتلوين مع الاطفال
الاطفال استمتعت جدا بيها زينا بالظبط
وطبعا كان فيه جوايز لاحلى رسمه .

وبعد ما وزعنا عصاير على كل الموجودين ( واكيد منسناش نفسنا ) بدأنا فى فتره الالعاب المفتوحه بقى

- كراسى موسيقيه
- مسابقات جرى
- ورقص ولعب مع اغانى الدى جى
- ووزعنا البسكوتات والحلويات على كل الحاضرين .

و فى أخر اليوم كرمنا 10 امهات من أمهات المعاقين
اخترهم مركز ذوى الاحتياجات الخاصه على اساس انهم يكونوا اكتر الامهات اللى بتتعب بجد مع اولادها وبتعتنى بيهم .

وفى الاخر وزعنا الهدايا على كل الاطفال الموجوده


وبجد كان يوم روعه
وماشاء الله بجد على كل الشباب اللى حضروا معانا

والحمد لله اننا عرفنا نبسط الاطفال دول واهلهم ولو يوم واحد من عمرهم
ويااا رب نقدر نعمل ايام جميله زى دى كتير بعد كده .



لو عاوزين تشوفوا الصور كلها والفيدوهات بتاعت الحفله ... أدخلوا على جروب الفريق على الفيس بوك

facebook

حفله الأطفال ذوى الأحتياجات الخاصه بالمحله

حفله الأطفال ذوى الأحتياجات الخاصه
=====================

حسينا أننا أهملناهم
وكان لازم نعمل ليهم حاجه
قررنا نحتفل بيهم ونحاول نسعدهم
نسعد اللى ملهومشى ذنب فى اعاقتهم ولا لنظر الناس ليهم .
نسعد طفل مجتمعنا نسيه وبيتعامل كانه مش موجود .

ودى أن شاء الله هتبقى أول خطوه .

زورنا مركز ذوى الأحتياجات الخاصه بجمعيه الشيخ عبد السلام أبو الفضل اللى فى المحله .
قولنا الفكر والحمد لله لقينا قبول كويس جدا عندهم .
وافقوا يشاركونا فى يوم هيبقى اكيد مميز لينا كلنا .
-----------------------------------------------------------------
أيه اللى هيحصل فى اليوم ده ؟
هنلعب مع الأطفال
وناكل معاهم
ونرسم ونلون
ونعمل مسابقات غناء
ومسابقات جرى
وهنجيب ليهم هدايا
------------------------
وهنكرم امهات الأطفال دى اللى صبروا مع أطفالهم واحتضنوهم وادولهم رعايه كبيره جدا .

-----------------------------------------------------------------

كل ده هيحصل أن شاء الله
يوم الخميس الجاى 26/3/2009
فى نادى بلديه المحله
الساعه 11 الصبح
-----------------------------------------

حفله مركز أورام الاطفال .. 9/3/2009

بسم الله الرحمن الرحيم
السلام عليكم

الحمد لله يا شباب قضينا المولد النبوى الشريف عند ربنا
اه .. بجد
ربنا قلنا هتلاقونى عند كل مريض
وأحنا الحمد لله فى اليوم الجميل ده روحنا زورنا المرضى الأطفال فى مستشفى الاورام اللى فى المنصوره
وكان يوم رائع جدا
كان معانا عدد كبير من الشباب واول ما طلعنا علقنا الزينه وعدينا على الاطفال وعملنا حفله صغيره كده ليهم
ووزعنا الهدايا
وقعدنا نلعب مع الاطفال كتير بقى والحمد لله اننا عرفنا نرسم بسمه جميله جدا على وشوشهم .
وبجد انا عايز اشكر جروب "بدايه " وجروب " عايز اعمل خير " علشان مجهودهم الرائع ده
وربنا يتقبل مننا جميعا .
-----------------------------------------
شاهد الصور على جروب الفيس بوك
http://www.facebook.com/group.php?gid=27649917621

ندوه صالح نفسك

ندوة صالح نفسك للدكتور / محمد أبو فرحة - ضمن فعاليات مهرجان طور نفسك - مهرجان التنمية البشرية الأول بجامعة المنصورة

التنمية البشرية علم الحياة, من أين يبدأ الإصلاح
هدفنا في الحياة, غيّر الصورة
مشوار الألف ميل يبدأ بخطوة, هل هدفك واقعي؟
كن رئيسًا في حياتك, هل أنت رحمة للعالمين
النظرة الإيجابية, اصدق مع نفسك
لست عاجزًا, هيلين كيلر... لماذا نجحت؟
الإصرار سر النجاح, غير طريقتك القديمة

مع الدكتور / محمد أبو فرحة

أول من قام بتدريب الشفرة الجديدة في البرمجة اللغوية العصبية في مصر, حاصل علي العديد من الدبلومات في مجالات علم النفس والتسويق والمبيعات والتنمية البشرية , خبير واستشاري في المعاملات الدولية والتنمية البشرية , صاحب العديد من البرامج التلفزيونية في العديد من القنوات الفضائية, له أكثر من ثلاثين برنامجًا من البرامج التدريبية المسجلة باسمه، مثل: الخطوة الأولى – جسور الثقة – صالح نفسك – اصنع حياتك – 7 أسرار لتصبح مليونيرًا – أسرار لا تعرفها النساء – أطلق عنان خيالك – علّم
– إعداد وتطوير الأئمة والدعاة والمحاضرين ....

الأحد : 8 - مارس 2009
مدرج الفرقة الإعدادية - كلية الصيدلة
الساعة الرابعة عصرآ

وحضرنا حفلة الأيتام

السلام عليكم ورحمه الله وبركاته
--------------------------

ازيكوا يا شباب عاملين ايه
احنا الحمد لله يا شباب حضرنا يوم السبت اللى فات 21/2/2009 حفله كان منظمها كذا جروب .
الحفله كانت فى نادى المهندسين اللى فى المنصوره
اليوم بجد رائع جدا جدا

الحفله بدأت الساعه 11 .
وجه عدد كبير من الايام فى النادى وبصراحه بدانا لعب معاهم على طول

الاول خالص اشتغل الدى جى على اغانى الاطفال
وقعدنا نلعب ونرقص مع الاطفال
وكان للاطفال العاب بين بعضهم
زى لعبه الكراسى وترتيب الاحاديث واللى يكسب كان بياخد جوايز

وبعد كده صلينا كلنا الظهر وطلعنا لقينا الاراجوز شغال واتفرجنا عليه كلنا واتوزع وجبات على الاطفال علشان معاد الأكل كان جه خلاص .

وكمان بعدها فضلنا نلعب تانى الالعاب اللى كلها جوايز وهدايا كتيييير دى
وفى أخر اليوم روحنا مكان فى النادى فيه العاب للطفال وقعدوا يلعبوا فيه
عربيات بالكهربه والساقيه والعاب كتير كتير , وطبعا احنا كمان لعبنا معاهم .

بس بجد اليوم كان رائع جدا جدا واحنا نفسنا فرحنا يمكن كمان اكتر من الاطفال دى .
وربنا يتقبل منا جميعا

ندوه " أهميه العلاج الطبيعى لذوى الاحتياجات الخاصه وارتباطه بالتخصصات الاخرى "

صور من داخل القاعه


بسم الله الرحمن الرحيم
أزيكوا يا شباب
المهارده كنا فى ندوه مهمه جدا وحبيت اشارككم الحاجات اللى عجبتنى فى الندوه دى
طبعا الندوه دى كانت تبع جمعيه الشيخ عبد السلام أبو الفضل لخيريه الاسلاميه اللى مقرها بالمحله

والندوه كانت عن
" أهميه العلاج الطبيعى لذوى الاحتياجات الخاصه وارتباطه بالتخصصات الاخرى "
واللى عرفناه أن الموضوع ده مهم جدا فعلا
وطبعا احنا مقدرناش نعلن عن الندوه دى للى يحيب يجى علشان الندوه كانت بدعوات من الجمعيه نفسها
والحمد لله ان الحظ حالقنا وكان لينا الشرف اننا حضرنا الندوه دى .
فى الندوه دى عرفنا مكانه ذوى الاحتياجات الخاصه وكل من عنده اعاقه هو مش سبب فيها
وعرفنا هما محتاجنا قد ايه
بس مش اننا نبص عليهم بنظره شفقه ونقول يا حرام وخلاص
لأ لازم يبقى لينا دور ايجابى معاهم
وكمان بعد ما عرفنا فى الندوه ان بعض الحالات ممكن تتعلم وتشتغل كمان .
والحمد لله اتفقنا مع المسؤلين عن المركز اننا هنعمل ليهم زياره فى المركز فى شهر مارس الجاى ان شاء الله .
ونعمل ليهم حفله يفرحوا فيها ويحسوا ان فى ناس بتهتم بيهم ويهمها تشوفهم مبسوطين .
وان شاء الله اول ما نحدد يوم الزياره هنبلغكم برضوه علشان اللى يحيب يجى يوميها او يتبرع بحاجه من مستلزمات الحفله .

والسلام عليكم ورحمه الله
10/2/2009

يوم محدش يقدر ينساه

بسم الله الرحمن الرحيم
ازيكوا يا شباب وعاملين ايه فى الاجازه
انا بصراحه كاتب الموضوع ده علشان احنا بجد قضينا يوم عمره ما يتنسى
كنا فى زياره لمركز الاورام اللى فى المنصوره
وكانت فى دعوه من اكتر من جروب من بينهم جروب " بدايه " و جروب " عاوز اعمل خير "
والحمد لله روحنا معاهم وعملنا حاجات كتير اوى
بدايه ان كان معانا عسل وادويه للاطفال لحد ما القصص والالعاب والزينه وادوات الرسم اللى كانوا جايبنها
وكمان افلام الكارتون اللى شغلوها للاطفال
والالعاب اللى لعبناها مع الاطفال
من الاخر كان يوم تحـــفه بكل المقايس

وكمان غير اننا قضينا وقت ممتع جدا ومع صحبه ما شاء الله عليهم ناس بجد الواحد يتمنى يقضى معاهم طول حياته
كمان احنا ساعدنا الاطفال دى ورسمنا بسمه على وشوهم محدش يقدر ينساها ابدا

وبصراحه انا سعيد جدا ان انا و الفريق قدرنا نعمل حاجه مفيده فى الاجازه
وان شاء الله مش هتبقى فى الاجازه وبس

شوفوا الصور بتاعت اليوم ده
وقولوا ايه رايك ؟
وكمان لو حد تانى عمل حاجه جميله زى دى يقولنا عليها

وربنا يجعله فى ميزان حسناتنا جميعا

معتشى فيه حل خلاص

الـــســـلام
تصدقوا فعلا كلمه جميله .
بس كمان مننساش انها حلم احلى .
الأمــــان
يااااااه احساس رائع .
بس مش عارف ليه بقلنا كتير مش حسينا بيه .
حاجه غريبه اوى مع ان المفروض ان الاجتين دول من ابسط حقوق اى انسان .
دا طبعا تبع حقوق الانسان اللى اصدرتها الامم المتحده .
ايوووه بالظبط هى هياها الامم المتحده اللى وقفت تتفرج على غزه وهى بتنحرق .
اه وعلى فكره هى هياها برضوه الأمم المتحده اللى مش عاوزه ارهاب فى العالم وخو=صوصا العالم العربى , ولا عاوزه كمان أسحله نوويه فى العراق وايران وسوريا بالمره .
بس طبعا اسرائيل ليها الحق فى ده علشان تدافع عن ارضها المقدسه اللى روياها بدم الشهداء الفلسطنين ,
وكمان تحقق الأمن لساكنها اللى اديهم غرقانه دم .. ( فعلا ناس غلابه )
- أكيد طبعا كلنا شوفنا اللى حصل فى غزه ولسه بيحصل لحد دلوقتى .
واكيد برضوه شوفنا موقف الحكام العرب النبيل , واللى حبوا يتعاملوا كناس متحضره وراحوا لمجلس الأمن
واللى بصراحه عمل مجهود رائع جدا ( فى استمرار اطلاق النار طبعا )
بس بصراحه بقى انا من ساعتها وانا فى كام سؤال كده فى دماغى .
يعنى مثلا لو اسرائيل بكره ضرب بلد تانيه او رجعت الضرب فى غزه يا ترى هيبقى ايه الحل .
مدام احنا الطريقه الحضاريه والمتمدنه ( بحسب العرف فى العصر ده ) منفعتشى معاهم . يبقى يا ترى نعاملهم زى ما بيعاملونا ؟؟
وبالنسبه لمجلس الامن والامم المتحده هل اللى حصل منهم ده هيعدى علينا ويمر مرور الكرام ولا هناخد موقف منهم ؟؟
ويا ترى السلام والأمن اللى بنسمع عنهم دول هنجربهم فى يوم ولا هنفضل كده ؟؟

كل الاسئله دى اكيد هنعرف الاجابه عليها بمرور الوقت .

بس السؤال بتاعى اللى بجد بقى وعاوز اجابه من كل واحد يقرا الموضوع ده

احنا ممكن نعمل ايه ؟
احنا الشباب .. الشباب الصح .
هيبقى ايه المفروض دورنا فى كل ده ؟؟؟