يوم كامل للكرتون مع حبايبنا

بسم الله الرحمن الرحيم



خبر متأخر بس هيبقي متجدد باذن الله

لما روحنا المستشفي المرة اللي فاتت والداده فتحت لنا الاوضه بتاعت الحفله قالت الاوضه دي متفتحتش بقالها 3 شهور

لأن كل الناس اللي بتيجي بتبقي زيارات بس وبيقعدوا مع الاطفال في الاوض ، وده يمكن سببه ان الاوضه صغيره فامش بينفع يتعمل فيها حفله كبيرة
...
عشان كده فكرنا هنروح المستشفي وهنفتح اوضه الحفلات بس هنعملها فيها حاجة مش هتحتاج مكان كبير وفي نفس الوقت نبقي طلعنا الاطفال من اوضهم

هنعمل حاجة بيحبها كل الاطفال بل واحنا كمان

هنعمل ايه ايه؟؟

هنتفرج علي كرتــــــون

مين فين مش بيحب يتفرج علي كرتون توم وجيري علاء الدين تيمون وبومبه وغيرها من الكرتونات اللي الاطفال والكبار كمان بيحبوها

هنجيب فشار وعصير وهنقعد الاطفال والامهات واحنا نتفرج علي كرتونات حلوه كتير

والمفاجأة : حلقات جديده من توم وجيري
:D:D

معلش هو الخبر متأخر شوية

بس ان شاء الله هتبقي حاجة متجدده هنروح لهم كل اسبوعين باذن الله نتفرج معاهم علي كرتون

طيب الكلام ده امتي ؟؟

بكره ان شاء الله الجمعه 22 ابريل

الساعه 1 ظهرا بعد الصلاة

والدعوة عامه :D

ان شاء الله يا جماعه اللي يجي يدخل من اي بوابه من بوابات مستشفيات الجامعه ويسأل علي قسم الاورام اللي تبع الجامعه مش اللي بره يا جماعه

عشان المرة اللي فاتت عملنا مكان تجمع وحصل لخبطه عند الناس

محتاجين ايه فاليوم ؟

اولا وجودك معانا
ثانيا بسكوتات او حلويات بس من غير شيكولاته
ثالثا عصاير
رابعا لعب للأطفال
وان شاء الله الفشار علينا :

http://www.facebook.com/event.php?eid=157145424348015

حفله يوم الأم مع الأطفــال ذوي الاحتيـاجـات الخــاصه

بســم الله الرحمــن الرحيــم

ان شاء الله هنحتفل اليوم ده مع الاطفال ذوي الاحتياجات الخاصه ، هنقضي معاهم يوم جميل نلعب ونلون وننبسط

احنا ==> نحمد ربنا علي النعم الكتير اللي ادهالناواحنا مش حاسين بيها
الأطفــال ==> يفرحوا ويلعبوا ويغيروا جو ونساعدهم يتفاعلوا مع البيئةالمحيطه
امهاتهم ==> هيفرحوا عشان فرحـه اولادهم ويعرفوا ان حد غيرهم بيفتكرهم وهنكرمهم في اخر اليوم ان شاء الله

ان شاء الله في نص اليوم هيبقي فيه وجبه غداء خفيفه للاطفال وامهاتهم .. وللمتطوعين ان شاء الله الوجبه هتكون بخمسـه جنيــه ، يعني كله يجي ومعاه الخمسه جنيه بتاعته :D
عشان كلنا هناكل مع بعض ان شاء الله

ملحــوظه مهمه جدا :: مركز اورام طنطا ( وليس مستشفي الاطفال) يحتاج ادوية وادوات طبية بصورة عاجله لأنهابدأت تخلص نظرا لوجود مشاكل بالاداره لتغييرها وحساب التبرعات مغلق محدش يقدر يتصرف فيه
عشان كده دكارتة وصيادلة المركز عملوا حمله للتبرع بجنيه عشان يشتروا الحاجات الناقصه واحنا ان شاء الله هنشارك معاهم ، كل واحد فينا يدفع جنيه واحد مشاركه معاهم عشان نساعد الاطفال هناك


احتياجات الحفـله :
1- طبعا عايزينكم انتم متطوعين كتيــر عشان نشارك في التنظيم و اللعب مع الاطفال
2- بلالين كتــــير جدا
3- العاب للأطفال زي عرايس عربيات مسدسات
4- صلصــال ( ناقص حوالي 20علبه ) ب
5- حلويات ، مصاصات ،بسكوتات
6- علب الوان خشب
7- عصاير للأطفال


يــوم الجمعه : 25 مارس 2011
الزمن: الحفله هتبدأ الساعه 2 بعد صلاة الجمعـه والتجمع هيبقي الساعه 1 ظهرا عشان نشارك كلنا في التنظيم

--------http://www.facebook.com/event.php?eid=107079126041773

صــور حفله مستشفي اطفال طنطا

بسم الله الرحمن الرحيم

من غيــر كلام كتير تعالوا شوفوا صور الحفله

لينك الصور علي الفيس بوك

http://www.facebook.com/photo.php?fbid=10150094337166580&set=a.10150094337101580.279345.707916579

حفـل مستشفــي اطفـال طنطــا _بنات فقط _

بسم الله الرحمن الرحيم

" تعالي بكرة "

قالتها اميرة البنوته الجميلة

قولتلها ايه رأيك في يوم الجمعه ؟

"قالتلي "خلاث تعالي الجمعة

في دعوة رقيقة منها عشان نروحلها ومعانا العروسة والسلسلة ...

اميـرة مقيمه في قسم الاورام في مستشفي الاطفال جامعه طنطا وعايزانا نروح لها يوم الجمعة نلعب معاهم ونهيص ونديها لعب وبلالين، هي وكل الاطفال اللي هناك ..

عايزين نقضي معاهم يوم جميل قبل ما نرجع الدراسه تاني وندعيلهم ربنا يشفيهم ويخفف عنهم ونخليهم يدعولنا دعوة حلوة ..

هنروح ان شاء الله يوم الجمعة القادم4 مارس 2011 الساعه واحده ظهرا بعد الصلاة في حفله ان شاء الله هيبقي فيها مفاجات كتير

واول مفاجأة انها بنات بس يعني المتطوعات هيبقوا بنات بس ان شاء الله

طيـب محتاجين ايــه؟

1- المتطوعات للتنظيم والمشاركة في الحفله

2- زينه وبلالين وهنحتاج بلالين كتيــــــر

3- القسم محتاج ادوية لكن الدكتورة المسئولة مقدرتش تحضر قايمه بيها وهتسيب لنا قائمه بالادوية الناقصه اللي القسم محتاجها يوم الجمعة وان شاء الله نروح نجيبها

يعني لو حد عايز يشارك بالادوية تقولنا في الحفله ونروح نجيب الادوية مع بعض عشان تبقي مطمنه :)

4- هنحتاج العاب للأطفال زي العرايس اوالعربيات

5- كرسات رسم والوان هنوزعها علي الاطفال في نهاية اليوم ونلون معاهم فيها

التجمع ان شاء الله هيبقي الساعه 12.30 ضهرا امام بوابة مستشفيات جامعه طنطا واللي هيجي بعد كده ممكن يدخل من اي بوابة ويسأل علي قسم اورام الاطفال

متنسوش يوم الجمعه الساعه واحده الضهر ادام بوابةمستشفيات الجامعه

بنات فقط

===================

هنزور أطفال مركز أورام طنطا - قبل الامتحانات

محدش نفسه يقضى يوم مع أطفال جمال ويلعب ويهزر ويتكلم معاهم ويجبلهم هديه جميله معاه أكيد كتيييييييييير مننا نفسهم فى يوم زى ده ...... طب تعملوا ايه لو عرفتم أن الأطفال دول مرضى و أن حضورك ليهم ده حاجه هما بيتمنوها و بيفرحوا جدا بيها هتعمل ايه لو عرفت ان مش كتير حد بيجيلهم وأنهم عندهم احباط من كتر ما شافوا اصحابهم اللى معاهم كل يوم بيموت منهم حد . كلنا هنروح -- هنروح علشان نفرحهم وعلشان ميحسوش انهم لوحدهم هنروح علشان نصبر امهاتهم ونقولهم أحنا جمبكم . هنجيب معانا دوا وعسل علشان نساعدهم بخطوه فى مشوار العلاج . علشان كده هنحتاج لحاجات كتير اوى اول واهم حاجه محتاجنكم انتم معانا علشان ترسموا بسمه جميله على وشوش الاطفال دول . ومحتاجين ادويه - عسل نحل - وعصاير - والعاب للأطفال - وزينه وبلونات - وكراسات تلوين والوان . كــــــــــــــل ده امتى بقى ؟؟ هيبقى ان شاء الله يوم الجمعه 17/12/2009 الساعه 1 الظهر بالظبط هنتجمع ان شاء الله قدام المركز ولأى أستفسار برجاء الاتصال على أ/ محمود نشـأت 0187820257 أو عن طريق الجروب

شـــهــر الــعــسـل " مركز أورام طنطا "

مشروع هدفه توفير واحد كيلو جرام من العسل الأبيض لكل مريض بمرض السرطان

عارفين

لما الاطفال المرضى تستغيث تفتكروا بتقول ايه ؟؟
......ارحمونا ؟؟
ساعدونا؟؟
الحقونا ؟؟

لا لا لا لا لا لا لا لا لا

بيقولوا بس كلمة واحدة

أأأأأأأأأأأأأأأأأأأه

أأأأأأأأه بتوجع اوى

أأه بتطلع من جوة القلب
من قلب الالم

أأأأأه لو سمعتوها متاكدين انها هتوجعكم اوى
وهتحسوها اوى

طيب احنا ردنا هيكون ايه ؟؟

الاطفال دول مصابين باورام او سرطان الدم او سرطان الجلد
اكبرهم ممكن لايتعدى ال12 سنة
الاطفال دول ملائكة الرحمن فى الارض
الاطفال دول ممكن يكونوا ولادنا
اخواتنا
او قرايبنا

المرض ابتلاء من ربنا عز وجل ممكن يصيب اى حد فينا
وربنا يعافى الجميع

طب نلحق ازاى الحالات دى؟؟ .. ازاى نكون سبب فى شفاء اى حاله منهم؟؟ .. اوعلى الاقل تقدم الحاله فى مستوى العلاج ؟؟
تعالوا نفكر مع بعض .........


ممكن نجيب لهم حاجه مهمه اوى و بيحتاجوها دايما ومفيش غنى عنها فى العلاج ده .. لانها بتعوضهم كرات الدم اللى بيفقدوها ..

الحاجه دى هى العسل .. ايوه .. العسل الابيض .. اللى ربنا (سبحانه وتعالى) قال عليه فى كتابه العزيز :
بسم الله الرحمن الرحيم

((شراب مختلف ألوانه فيه شفاء للناس(( صدق الله العظيم


تخيلوا لما ندفع 11 جنيه بس علشان نجيب نص كيلو عسل .. وبالمبلغ البسيط ده بنساعد -بعد ربنا سبحانه وتعالى- على تحسين حاله طفل و زوال مرضه بإذن الله ..
بالعسل الابيض؟؟؟؟؟؟

════════════════════
ايوه بالعسل الابيض اللى كلنا بنحبه ده

العسل مفيد ليهم فى حاجات كتيرة زى

اولا .....
═══════
العسل سعراته الحرارية عالية فده بيديله الطاقه يتحرك ويجرى ويلعب عادى ... علشان طبعا الكيماوى بيهده فى السرير
فالعسل بيزيد من طاقته كتير

ثانيا ....
═══════
العسل فاتح للشهية ... بسبب جرعة الكيماوى مش بيكون لية نفس ياكل من يوم ل 3 ايام
مبيفرقش بين طعم السكر والملح
مش بيكون بمزاجه بيكون غصب عنه .... فالعسل بيفتح شهيته

ثالثا ....
═══════
مع تكرار اخذ الجرعات بينتج عنها التهابات فى الفم .... مع تكرار عملية التحنيك بالعسل دة بيشيل الالتهابات خالص وبيرجع الفم زى ما كان واحسن

رابعا....
═══════
.عارفين يعنى ايه طفل بيفقد كرات دم؟؟ .. وعنده كمان سرطان؟؟ ..
يعنى مناعته بتقل .. وبالتالى مقاومته للمرض كمان بتقل .. و .......ممكن....... يتوفى ...
تخيلوا لما طفل يتوفى بسبب عدم توفير العسل اللى هو محتاجه !!


الى جانب بقا انه مسكر وطعمه حلو

طيب احنا رحنا فين بقى ؟؟ ..ما إحنا والحمد لله قادرين وممكن نوفر لهم كل اللى هم عاوزينه

════════════════════

لأ وكمان العمل الرائع ده بيدوم لكل اللى عملوه فى الدنيا والاخره .. بنتعاون عليه كلنا فى الدنيا .. وبسببه بنتجمع فى الاخره ..


وده مش كلامى انا .. ده كلام ربنا سبحانه وتعالى فى كتابه العزيز
بسم الله الرحمن الرحيم : ((وسيق الذين اتقوا ربهم إلى الجنة زمرا)) صدق الله العظيم
يعنى كلنا هانبقى مجموعه واحده وكلنا ندخل الجنه مع بعض؟ .. ايوه بالضبط كده ان شاء الله
لاننا عيشنا ايد واحده فى الدنيا وهانفضل بعون الله ايد واحده فى الاخره كمان

والله ده احلى احساس ممكن اى انسان يحسه .. أنا نفسى كلنا نحس الاحساس ده .. عاوزه كل انسان مسلم موحد بالله يدخل ويقول "عاوز ابقى معاكم"
عاوزه كلنا نتجمع يوم القيامه مع بعض خلف رسولنا الكريم (صلى الله عليه وسلم) اللى بإذن الله هايكون فخور بينا و باللى عملناه من بعده ..


ها ؟؟ .. مين اللى اتحرك فى قلبه الخير ؟؟ .. مين عاوز يبقى معانا ؟؟ .. مين عاوز ياخد ثواب يدخل بيه الجنه ؟؟ .. مين هايضم صوته لصوتنا ؟؟ .. مين هايكون إيجابى بمشاركته لنا ؟؟ .. مين هايدخل بعدى ويقول ..
(عاوز اعمل خير) ..


عايزين شعارنا الفترة الجاية يكون....
قطرة عسل= ضحكة طفل
ضحكة طفل = الجنـــــة


اكفل طفل من اطفال مركز الاورام بكيلو عسل شهريا....
كيلو عسل واحد بس كل شهر ممكن يدخلك الجنة....

════════════════════
للاشتراك

محمود نشأت

0187820257

shbabsa7@gmail.com

للبنات

girls_info_shbabsa7@yahoo.com

----------------------------------------

الفكرة يتم تنفيذها في

1-
مجموعة
وانـــا كــمــان عـــاوز اعــمــل خير
http://www.facebook.com/event.php?eid=109812209048810&ref=mf

2-
جمعية خير دمياط
لينك الايفنت
http://www.facebook.com/event.php?eid=114825818537584

3-
جروب شــــــبــاب صـــــ√ــــح
http://www.facebook.com/group.php?gid=27649917621

شنطة رمضان 1431

شهر رمضان .. شهر الخير

ناس كتير بتستناه من السنه للسنه وفي ذلك مختلفون

فيه ناس بتستناه عشان العبادات
...
وفيه ناس بتستناه عشان تحصل علي ثواب مضاعف من اي حاجة تعملها

وفيه ناس بتستناه عشان وجبه المسلسلات الشهيه اللي بتيجي فالتلفزيون

وناس عشان الاكل الكتير والعزومات

وفيه ناس مش لاقيه الاكل الكتير ده ولا حتي جزء منه

دول الناس اللي احنا عاملين الايفنت ده عشانهم

عشان نوصلهم مواد غذائية تموينيه يقدروا يعملوا بيها اكل يكفيهم ، رز ومكرونه
وبقوليات وزيت

هنعمل ان شاء الله شنطتين

شنطه في اول رمضان ، وشنطه في نص رمضان

عشان الشنطة الواحده مش بتكفي الاسره طول الشهر

ايه مكونات الشنطة

:
2كيلو رز
2كيلو فول
1 كيلو مكرونة
1كيلو فاصوليا
1كيلو تمر
1كيلوسكر
ا زجاجة زيت

=====================

الايفنت ده مش بس معمول للناس اللي محتاجه غذاء واكل

ده كمان عشان الناس اللي محتاجه حسنات تزود بيها رصيدها وتتقل بيها ميزانها ، الناس اللي محتاجه تاخد ثواب ، اللي محتاجه تكفر عن ذنوبها عن سيئات او قسم رجعوا فيه

باطعام المساكين
وده مش اطعام عادي

ده افطار ، وفي شهر رمضان

شهر رمضان اللي الناس بتستناه
وانت حدد بتستناه ليه ؟

مطلوب منك ايه ؟ او تتقدر تشارك ازاي ؟

1- اهل بيتك اللي اكيد بيجهزوا لأكل رمضان من دلوقتي قولهم ان فيه ناس محتاجه كميه اقل من دي بكتير وعرفهم الثواب اللي هياخدوه لو شاركو بكيلو او اتنين رز او مكرونه

2- ساهم بمواد غذائية او مشاركات ماديه

3- شارك في شراء ونقل المواد الغذائية

4- ساعد في تعبئة وتكييس الشنط

5- ساعد في توزيع الشنط علي محتاجينها

-----------------------------------

للتواصل والاستعلام
============

أ / محمود نشأت 0187820257

shbabsa7@gmail.com للشباب

girls_info_shbabsa7@yahoo.com للبنات

==================================

وتذكر أن الصائم بإمكانه أن يحصل على أجر أكثر من صائم لقوله صلى الله عليه وسلم :" من فطر صائما كان له مثل أجرة غير أنه لا ينقص أجر الصائم شئ ". (أخرجه أحمد , والترمذى)