الأحد، 9 نوفمبر 2008

التعليم مش كده ..






كلنا اكيد سمعنا عن وفاه اسلام الطالب
في مدينه الاسكندريه

والدنيا كالعادة قامت ومقعدتش
وكل الصحف اتكلمت وكل القنوات صورت
وسمعنا كلام كتتتير وكأن دة اللي هيرجع حق اسلام واسرته مع العلم ان مهما كان حكم القضاء مع ثقتي الكامله في حكم القضاء
مش هيكون هناك ترضيه مناسبه لاهل الطفل
الكل اخد الفرصه للنقد وتوجيه اللوم للمدرسين
وان المدرسين بيتعاملوا بوحشيه مع الطلبه
وان فلان عينه ضاعت لما المدرس ضربه والبنت اياها حصلها مش عارف ايه....
من الناحيه التانيه ثار المدرسين ثوره عارمه
واطلقوا صفير انذار
وظهرت دعواهم باان الفصل في 70 طالب
وكل طالب جاي من بيئه مختلفه
واسلوب المناهج مش بيساعد ان احنا نعلم الطالب من غير مانستخدم الضرب
وان معتش في تربيه وان اسلوب الطلبه مستفز
وبدأوا في سرد الحكايات
المدرس الفلاني الولد شتمه قدام بقيه الفصل
والمدرسه الفلانيه لما ضربت الولد والد الولد جابلها شويه بلطجيه بهدلوها
وهكذا وهكذا
افتكرت دلوقتي كلمه عادل امام
بلد بتاعه شهادات صحيح
الظاهر ان بلدنا حتي لايمكن اطلاق لقب بلد بتاعه شهادات عليها
لان اللي بيتم حاليا في التعليم هو عجن وعك علي تقيل
لان بلدنا اصبحت ضحيه لاسلوب عقيم للتعليم واطفالنا ومدرسينا
ياعيني
اصبحوا عينات التجارب
واللي بيفلت من دة
بيكون محظوظ حبتين وبيتعلم في مدارس لغات
مع اني لا انفي ان يكون هناك قليل من العجن والعك بس علي خفيف
والمهم
وزي ماواضح ان الميزان اختل تماما
كان لازم بدل الشكوي
نقوم بدور فعال وايجابي
من خلاله نقدم مساعدة للمجتمع حوالينا
وبما ان المدرسين دول اباءنا واخواتنا
والطلبه بردة اخواتنا .....وعشان انا لسه صغيره مش كبييره اوي ماينفعش اقول ولادنا بس يلا.........
وبردة اولادنا
يلا وماله
المهم
قررنا وبما اننا دوما مبادرين كشباب صح
اننا نقوم بحمله توعيه
للمعلمين
نذكرهم بدورهم في بناء جيل جديد
وامه بتعتمد علي تفاعلهم مع ابناءها
وحلم بيزرعوة جوه اولادنا .......حلمنا بالنهضه نفكرهم ان حلمنا..... هو حلمهم
و نقوم كمان بتوعيه للطلبه اللي هم حلم النهارده وبكره
توعيه وتذكره باان اللي واقف قدامه هو اب او ام او اخت هدفها صالحه وصالح الوطن وحملتنا هتشمل توعيه دينيه ونفسيه ودورات تاهليه من خلال كورسات تنميه بشريه
ومن هنا يمكن تكون البدايه
لنهضه تعليمه جديدة
هنلاقي بوستر مصصم للحمله هنحاول برضوه كلنا ننشرها ..
وننشر المواضيع على قد ما نقدر فى المواقع و المنتديات علشان كلمنا يوصل لاكتر عدد ممكن
.

كتبها : أ/ نهى جمال الدين

Template by - Abdul Munir | Daya Earth Blogger Template